ഒരു നല്ല വാര്‍ത്ത വരാന്‍ പോകുന്നു, ഭാര്യയ്‌ക്കൊപ്പമുള്ള ചിത്രം പങ്കുവെച്ച്‌ ബാല, ആകാംക്ഷയോടെ ആരാധകര്‍.

 

കരള്‍മാറ്റ ശസ്ത്രക്രിയയ്‌ക്ക് ശേഷം വീണ്ടും സോഷ്യല്‍മീഡിയയില്‍ സജീവമായി നടൻ ബാല. ഭാര്യ എലിസബത്തിനൊപ്പം നില്‍ക്കുന്ന ചിത്രം പങ്കുവെച്ച്‌ താരം ഇൻസ്റ്റഗ്രാമില്‍ കുറിച്ച കുറിപ്പാണ് ഇപ്പോള്‍ സോഷ്യല്‍മീഡിയയില്‍ ചര്‍ച്ചയാകുന്നത്.

'ഒരു നല്ല വാര്‍ത്ത വരാൻ പോകുന്നു' എന്നായിരുന്നു താരത്തിന്റെ കുറിപ്പ്. എന്താണ് ആ വാര്‍ത്ത എന്ന് അറിയാനുള്ള ആകാംക്ഷയിലാണ് ആരാധകരും. കമന്റ് ബോക്‌സിലും കാര്യം തിരക്കിയുള്ള ചോദ്യങ്ങളാണ്. താരം ഇതുവരെ എന്താണ് വിശേഷമെന്ന് വെളിപ്പെടുത്തിയിട്ടില്ല.

കഴിഞ്ഞ ദിവസങ്ങളില്‍ ചെകുത്താൻ എന്ന പേരില്‍ അറിയപ്പെടുന്ന യൂട്യൂബര്‍ അജു അലക്സും ബാലയും തമ്മിലുള്ള വിവാദങ്ങള്‍ ഏറെ ചര്‍ച്ചയായിരുന്നു. ആറാട്ട് അണ്ണൻ എന്നറിയപ്പെടുന്ന സന്തോഷ് വര്‍ക്കിയെ കൊണ്ട് മാപ്പ് പറയിപ്പിക്കുന്ന ഒരു വീഡിയോ പങ്കുവച്ചതിന് പിന്നാലെയാണ് ഇവര്‍ തമ്മിലുള്ള പോരാട്ടം തുടങ്ങിയത്.

ഉണ്ണി മുകുന്ദൻ നായകനായി എത്തിയ 'ഷെഫീക്കിന്റെ സന്തോഷം' ആണ് ബാലയുടെതായി ഒടുവില്‍ റിലീസ് ചെയ്‍ത ചിത്രം. നവാഗതനായ അനൂപ് പന്തളമാണ് ചിത്രം സംവിധാനം ചെയ്‍തത്.